نئی دلّی ، کویت میں رہنے والے ہندوستانی نژاد طالب علم ما رِدھی راج کمار نے آج 18000 روپئے کا ایک چیک وزیر اعظم جناب نریندر مودی کو پیش کیا ، جو اُن کی طرف سے فوج کے ویلفیئر فنڈ کے لئے ایک عطیہ ہے ۔ انہیں اِس رقم کے برابر یعنی 80 کویتی دینار اے سی ای آر سے انعام کی رقم کے طور پر ملے تھے ۔ ما رِدھی راج کمار نے آج یہاں وزیر اعظم جناب نریندر مودی سے اپنی والدہ کے ہمراہ ملاقات کی ۔
کویت میں واقع انڈین ایجو کیشنل اسکول کے طالب علم ما رِدھی راج نے آسٹریلیا کی تعلیمی ریسرچ کی کونسل ( اے سی ای آر ) کی طرف سے منعقد کئے گئے تعلیمی مہارت سے متعلق ٹسٹ میں یہ انعام حاصل کیا ۔ ما رِدھی راج نے مشرقی وسطیٰ کے علاقے سے ریاضی اور سائنس دونوں میں بہترین کار کردگی کا مظاہرہ کرکے 80 کویتی دینار جیتے ۔
جناب نریندر مودی نے ما رِدھی راج کو اُن کی فیاضی اور تعلیم کے میدان میں مہارت کے لئے مبارکباد پیش کی ۔ وزیر اعظم کو یہ بھی معلوم ہوا کہ اِس طالب علم نے اور بھی بہت سے انعامات جیتے ہیں ۔
طالب علم کی ماں محترمہ کروپا بھٹ نے وزیر اعظم کو بتایا کہ وہ ایک پروجیکٹ پر کام کر رہی ہیں ، جس کا موضوع ہے ، ’ ہر بچہ ایک جینیس ہے ‘ ۔ وہ بچوں میں لیاقت کی نشاندہی کے لئے ٹیچروں کے لئے مفت سیمینار بھی منعقد کرتی رہتی ہیں ۔ وزیر اعظم نے اختراعی نوعیت کے تعلیمی پروجیکٹوں کو پھیلانے میں دلچسپی دکھانے پر اُن کو بھی مبارکباد دی ۔
