نئی دہلی، ڈاکٹر ستیہ پال سنگھ نے آج نئی دلی میں انسانی وسائل کی ترقی کے وزیر مملکت کے طور پر کام کاج سنبھالا۔ وہ لوک سبھا پارلیمانی حلقے میں باغپت (اترپردیش) کی نمائندگی کرتے ہیں۔
جناب ستیہ پال سولہویں لوک سبھا (2019۔2014) کے ممبر ہیں۔ وہ پارلیمنٹ ہاؤس کمپلکس کی سکیورٹی کی مشترکہ پارلیمانی کمیٹی کے بھی ایک ممبر ہیں۔ اس کے علاوہ وہ امور داخلہ کی قائمہ کمیٹی کے ممبر اور پارلیمنٹ ممبروں کی تنخواہوں اور بھتوں سے متعلق مشترکہ کمیٹی کے ممبر، دیہی ترقیات، پنچایت راج اور پینے کے پانی نیز حفظان صحت کی وزارت کی مشاورتی کمیٹی کے ممبر بھی ہیں۔
جناب سنگھ 1980 بیچ کے آئی پی ایس افسر ہیں جنہوں نے مختلف عہدوں پر بڑی جانفشانی سے کام کیا۔ وہ ممبئی، پنے اور ناگ پور کے پولیس کمشنر اور مہاراشٹر کے امن و قانون کے ایڈیشنل ڈی جی پی رہے۔ انہوں نے سرکاری ملازمت سے قبل از وقت سبکدوشی حاصل کی اور 2014 میں سیاست میں داخل ہوئے۔
