موسم سرماکے عالمی کھیلوں میں شرکت کرنے والے خصوصی ایتھلیٹس کی پرجوش انداز میں الوداعی تقریب

نئی دہلی، 10مارچ آسٹریا میں 14 سے 25 مارچ 2017 کو ہونے والے موسم سرما کے عالمی کھیلوں میں شرکت کرنے والے خصوصی ایتھلیٹس، ان کے کوچوں اور افسران کے لیے آج یہاں ایک پرجوش انداز میں الوداعی تقریب منعقد ہوئی۔ اس موقع پر نوجوانوں کے امور اور کھیلوں کے وزیر مملکت جناب وجے گوئل اور سماجی انصاف و تفویض اختیارات کے وزیر کرشنا پال گوجر بھی موجود تھے۔ اپنی تقریر میں جناب وجے گوئل نے کہا کہ ان کی وزارت قومی چمپئن شپ کے انعقاد، کوچنگ اور تربیت کے لیے ’’خصوصی اولمپک بھارت‘‘ کو مالی امداد فراہم کر رہی ہے۔ انھوں نے کہا کہ آئندہ عالمی موسم سرما کھیلوں میں شرکت کے لیے حکومت نے 90 ایتھلیٹس 23 کوچوں اور 3 افسروں پر مشتمل دستے کے لیے 1.5 کروڑ روپئے خرچ کئے ہیں۔

دستے کو بہترین نیک خواہشات پیش کرتے ہوئے جناب گوئل نے کہا کہ ان ایتھلیٹوں نے ثابت کردیا ہے کہ مصمم ارادے کے ذریعہ کوئی بھی شخص اپنی زندگی میں کچھ بھی حاصل کرسکتا ہے انھوں نے امید ظاہر کی کہ ان میں سے بہت سے خصوصی ایتھلیٹس ایک ابھرتے ہوئے کھلاڑی بنیں گے اور ملک کا نام روشن کریں گے۔ جناب گوئل نے کہا کہ وزیر اعظم جناب نریندر مودی نے خواہش ظاہر کی ہے کہ کوئی بھی شہری کھیل کے موقع سے محروم نہیں رہنا چاہئے۔ سماج کے سبھی طبقوں کو اپنی پسند کا کوئی بھی کھیل سرگرمی میں شرکت کرنےمیں خوشی حاصل کرنی چاہئے تاکہ وہ خوش اور صحت مند رہ سکے۔