نئی دہلی، فولاد کی وزارت نے اُس کے زیر انتظام سرکاری سیکٹر کے متعدد مرکزی کارخانوں(سی پی ایس ایز) کی طرف سے موصول ہونے والی اس تجویز سے اتفاق کرلیا ہے کہ ایگزیکیٹو افراد کے لئے یکم جنوری 2007 سے اور غیر ایگزیکیٹو افراد کے لئے یکم جنوری 2012 سے یا کسی ایسی تاریخ سے جس کا فیصلہ کمپنی کرے، پنشن اسکیم شروع کی جائے۔ ایس اے آئی ایل، آر آئی این این ، ایم ایس ٹی سی ، ایف ایس این ایل ، ایم ای سی او این اور کے آئی او سی ایل سے تعلق رکھنے والی ملازمین کی یونینوں اور افسروں کی ایسوسی ایشنوں کے نمائندوں سے تفصیلی تبادلہ خیال کے بعد یہ اتفاق رائے ہوا ہے۔ فولاد کے محکمہ کے مرکزی وزیر چودھری بریندر سنگھ نے آج نئی دہلی میں یہ اعلان کیا۔
وزیر موصوف سے ملاقات کے دوران ملازمین کی یونینوں اور افسروں کی ایسوسی ایشنوں کے نمائندوں نے اُن سے متعلق مختلف مسائل پر تبادلہ خیال کیا، جس میں ریٹائرمنٹ کے فائدوں کے ایک حصے کے طور پر پنشن اسکیم شروع کرنے، پراویڈینٹ فنڈ ، گریچویٹی اور میڈیکل فوائد شامل ہیں۔ وزیر موصوف نے مطلع کیا کہ فولاد کی وزارت کے تحت سی پی ایس ایز کے ملازمین کو میڈیکل فوائد پہلے ہی فراہم کردئے گئے ہیں۔ این ڈی ایم سی اور ایم او آئی ایل نے تنخواہوں پر نظرثانی کی دوسری کمیٹی کی سفارشات کے مطابق اپنے ملازمین کے لئے پنشن اسکیم بھی شروع کردی ہے۔ انہوں نے کہا کہ دوسرے سی پی ایس ایز کے ملازمین طویل عرصے سے پنشن اسکیم شروع کئے جانے کا مطالبہ کرتے آرہے ہیں۔
چودھری بریندر سنگھ نے بتایا کہ پنشن اسکیم سے فولاد کی وزارت کے تحت مختلف سی پی ایس ایز کے 94 ہزار سے زیادہ موجودہ اور 56 ہزار ریٹائرڈ ملازمین کو فائدہ پہنچے گا۔ انہوں نے کہا کہ اس سے ماہانہ 45 کروڑ روپے کا فاضل مالی بوجھ اٹھانا پڑے گا۔ انہوں نے کہا کہ پنشن اسکیم کا انحصار چند شرائط پر ہوگا، مثلاً سی پی ایس ایز کی گنجائش، ادائیگی کی صلاحیت اور پائیداری۔ ان اسکیموں کو چلانے کے لئے حکومت کی طرف سے بجٹ میں کوئی امداد نہیں دی جائے گی۔ اس سلسلے میں ملازمین کی طرف سے جمع کی جانے والی رقم کی شرح کا فیصلہ ہر سال سی پی ایس ایز کے متعلقہ بورڈ کریں گے جس کا انحصار کمائے گئے منافع پر ہوگا اور ملازمین کی طرف سے کمپنی میں جمع کر ائی گئی روپے کی حد پر ہوگا، جو 30 فیصد ہوگی۔ (بنیادی تنخواہ ،جمع، مہنگائی بھتہ) پنشن اسکیم کی اصل تفصیلات اور اس پر عمل درآمد کا طریقہ ہر سی پی ایس ای کا انتظامیہ مرتب کرے گا۔
