نئی دہلی، نائب صدر جمہوریہ ہند جناب ایم وینکیا نائیڈ و نے زراعت کو نفع بخش اور پائیدار بنانے کے لئے صفر بجٹ والی قدرتی زراعت کو فروغ دینے کی اپیل کی ہے۔ وہ آج یہاں ہماچل پردیش کے گورنر آچاریہ دیو ورت ، زرعی ماہر جناب سبھاش پالیکر اور آندھرپردیش کے گورنر کے مشیر برائے زراعت جناب وجے کمار سے گفتگو کررہے تھے۔ ان کی یہ گفتگو کسانوں کی آمدنی دوگنی کرنے اور زراعت کو نفع بخش و پائیدار بنانے سے متعلق قومی مشاورت کے ایک جزو کے طور پر تھی۔
جناب آچاریہ دیوورت نے کسانوں کی آمدنی کو بہتر بنانے کے لئے ہماچل پردیش میں اپنائے جانے والے زرعی طور طریقوں کے بارے میں بتایا۔ جناب سبھاش پالیکر اور جناب وجے کمار نے نائب صدر جمہوریہ کو لاگت میں کمی لانے ا ور قدرتی زراعت کو فروغ دینے میں صفر بجٹ والی زراعت کے رول کے بارے میں بتایا۔
نائب صدر جمہوریہ نے زراعت سےمتعلق مختلف امور پر تفصیلی تبادلہ خیال کیا ۔ انہوں نے حال ہی میں مہاراشٹر کے شہر پونے میں منعقدہ زراعت سے متعلق قومی مشاورت کے نتائج کا اشتراک بھی کیا۔ انہوں نے کہا کہ ملک بھر میں قومی مشاورت کا اہتمام کیا جارہا ہے تاکہ زراعت کو پائیدار اور نفع بخش بنانے کے لئے حقیقی حل دریافت کئے جاسکیں۔ نائب صدر جمہوریہ نے زراعت کو نفع بخش بنانے کے لئے جدت طرازی پر مبنی حل دریافت کرنے اور انہیں پروان چڑھانے کی اپیل کی۔
ماضی کے برعکس سے ابھی کسانوں کو کثرت پیداوار کا مسئلہ درپیش ہے اور ضرورت اس بات کی ہے کہ خرید کے نظام کو منظم بنایا جائے۔ بڑھتی ہوئی لاگت اور کسانوں کے لئے معینہ قیمت کےفقدان پر اپنی تشویش کا اظہار کرتے ہوئے انہوں نے دھان اور خریف کی دیگر فصلوں کےلئے ایم ایس پی میں زبردست اضافے کے لئے مرکزی حکومت کی ستائش کی۔
تبادلہ خیال کے دوران نائب صدر جمہوریہ نے قدرتی زراعت کو فروغ دینے کے لئے ہماچل پردیش کے گورنر کی ستائش کی۔ انہوں نے کہا کہ دوسری ریاستوں کو چاہئے کہ وہ زراعت سے متعلق بحران کو کم سے کم کرنے کے جزو کے طور پر ہماچل پردیش سے ترغیب حاصل کریں۔
جناب نائیڈو نے کہا کہ آب و ہوا کی تبدیلی کے بڑھتے ہوئے مسئلہ کے پیش نظر زراعت ایسی ہونی چاہئے جو موسم سے متاثر نہ ہو۔ انہوں نے زراعت اور متعلقہ سرگرمیوں میں بچولیوں کے رول کو ختم کرنے کی ضرورت پر زور دیا۔ کیمیاوی کھادوں جراثیم کش اداویات کی بھاری قیمت کا حوالہ دیتے ہوئے انہوں نے ریاستی حکومتوں کو مشورہ دیا کہ وہ ایسی پالیسیاں بنائیں جو کسان دوست ہوں۔ انہوں نے کہا کہ اس بات کی اشد ضرورت ہے کہ سبھی متعلقین کسانوں اور صارفین کے مفادات کے تحفظ کے لئے ایک متواز ن نقطہ نظر اختیار کریں۔
‘صفر- بجٹ والی قدرتی زراعت ’ کے سلسلہ میں نیتی آیوگ کے ذریعہ صلاح و مشورہ کی ستائش کرتے ہوئے نائب صدر جمہوریہ نے کہا کہ نیتی آیوگ کو کسانوں تک ریسرچ کے نتائج پہنچانے کے لئے لازماً بڑا کردار ادا کرنا چاہئے۔
نائب صدر جمہوریہ نے کہا کہ وہ چنئی اور دہلی میں ہونے والی قومی مشاورت کی سفارشات ملنے کے بعد ان کے ساتھ ایک بار پھر تبادلہ خیال کریں گے۔
