نئی دہلی، ریلوے اور کوئلہ کے مرکزی وزیر جناب پیوش گوئل آج نئی دہلی میں سیاحت کے مرکزی وزیر جناب کے جے الفونس اور مراقش کے وزیر سیاحت جناب محمد ساجد کی موجودگی میں ہندستان کے پہلے انڈیا ٹورازم مارٹ (آئی ٹی ایم-2018) کا افتتاح کیا۔ انڈیاٹورازم مارٹ کا انعقاد سیاحت کی وزارت کے ذریعہ فیڈریشن آف ایسوسی ایشنز ان انڈین ٹورازم اینڈ ہاسپٹلیٹی (ایف اے آئی ٹی ایچ) کی شراکت داری اور ریاستی /مرکز کے زیر انتظام علاقوں کی حکومتوں کو تعاون سے 16 سے 18 ستمبر 2018 کے دوران کیا جارہا ہے۔ اس تقریب میں سکریٹری ، وزارت سیاحت کے دیگر سینئر اہلکار اور ایف اے آئی ٹی ایچ کے چیئرمین ، اراکین اور ہندستان و دنیا بھر کے مندوبین شرکت کررہے ہیں۔
اس تقریب کا افتتاح کرتے ہوئے جناب پیوش گوئل نے اس خواہش کا اظہار کیا کہ سیاحت کی وزارت آئندہ پانچ برسوں کے اندر سیاحوں کی آمد سے سالانہ سو بلین ڈالر آمدنی حاصل کرنے کے ہدف کی تکمیل کر پائے۔ وزیر موصوف نے کہا کہ جب تک بنیادی ڈھانچوں /مبادیات کا قیام عمل میں نہیں آتا ، تب تک ہندستان ایک پسندیدہ سیاحتی مرکز کے طور پر سامنے نہیں آسکتا۔ ا نہوں نے کہا کہ موجودہ حکومت اس طرح کی سہولت کے فروغ کے لئے کوشاں ہے ۔ ان کوششوں میں 24 گھنٹے بجلی کی سپلائی کو یقینی بنانا ، قابل تجدید توانائی کی شکلوں کا فروغ اور دور دراز سیاحتی مقامات کو موثر طریقے سے کنیٹ کرکے کنیٹی ویٹی کو بہتر بنانا شامل ہیں۔ وزیر موصوف نے مزید کہا کہ سب سے اہم عنصر جس سے سیاحت کے فروغ میں مدد ملے گی وہ ہے حکومت کے ذریعہ چلائی جانے والی صفائی ستھرائی کی مہم ، سووچھتا ابھیان جس سے ہندستان کو سبھی بین الاقوامی سیاحوں کے لئے ایک ترجیحی سیاحتی مقام بنانے کو یقینی بنایا جاسکے گا۔ سیاحتی شعبے میں آمدنی میں کئی گنا اضافے کے امکان کا ذکر کرتے ہوئے وزیرموصوف نے کہا کہ سیاحت سے رسمی اور غیر رسمی شعبوں میں کئی طرح کے روزگار کے مواقع پیدا ہوتے ہیں۔ جناب گوئل نے مزید کہا کہ ملک کے نوجوان اس شعبے میں صنعت کار ، سروس پروائیڈر ، مترجم وغیرہ کارول ادا کرسکتے ہیں اور اس بات کو یقینی بنا سکتے ہیں کہ ہندستان کی گونا گوں خصوصیات کے سبب اس میں زبردست امکانات موجود ہیں جس سے ہمیں صرف فائدہ اٹھانا ہے۔ اس موقع پر اظہار خیال کرتے ہوئے سیاحت کے وزیر نے اعلان کیا کہ دیگر بین الاقوامی سیاحتی مارٹ کی طرح اس سال کے بعد اب ہر سال ستمبر ماہ میں آئی ٹی ایم کا انعقاد کیا جائے گا۔ وزیر موصوف نے کہا کہ بھارت اتنا وسیع و عریض ملک ہے کہ ہر سال یہاں کچھ نہ کچھ نیا دیکھنے اور محسوس کرنے کے لئے ہوگا۔ ایسا یہاں رنگا رنگ جغرافیائی صورتحال ، ثقافت ، روایات ، تعمیراتی عمدگی ، مذاہب وغیرہ کے سبب ہے۔جناب الفونس نے یہ بھی کہا کہ اب ملک کا دورہ کرنا آسان ہوگیا ہے کیونکہ اب 166 ممالک کے لئے ای-ویزا نظام ممکن ہوچکا ہے۔
انڈیا ٹورازم مارٹ (آئی ٹی ایم) پہلی ایسی تقریب ہے جس میں وزارت کے تعاون سے سیاحتی صنعت کے متعلقین اتنے بڑے پیمانے پر ساتھ آرہے ہیں۔ ایف اے آئی ٹی ایچ (فیتھ) تجارت اور میزبانی سے وابستہ ملک کی سبھی اہم تنظیموں کا چوٹی کا ادارہ ہے۔ ایف ایچ آر ا ے آئی ، ایچ اے آئی ، آئی اے ٹی او جیسے دس بڑی ٹورسٹ تنظیمیں اس تقریب میں شرکت کررہی ہیں اور انڈیا کنونشن پروموشن بورڈ (آئی سی پی بی) تقریب میں کوآرڈی نیشن کا کام کررہا ہے۔ یہ ایک بزنس ٹو بزنس تقریب ہے۔ اس تقریب کا مقصد دنیا بھر میں منعقد ہونے والے بڑے بین الاقوامی ٹریول مارٹس کی طرز پر ہندستان میں ایک سالانہ گلوبل ٹورازم مارٹ بنانا ہے۔ یہ مارٹ سیاحت اور میزبانی کی صنعتوں سے وابستہ تنظیموں، اداروں اور افراد کو ایک دوسرے کے ساتھ تبادلہ خیال کرنے اور تجارتی مواقع کا لین دین کرنے کا موقع فراہم کرتا ہے۔
آئی ٹی ایم 2018 میں تقریباً 225 بین الاقوامی خریدار اور دنیا بھر کی میڈیا کے افراد شرکت کررہے ہیں۔ اس میں شمالی امریکہ ، مغربی یوروپ ، مغربی ایشیا ، لاطینی امریکہ، سی آئی ایس ممالک وغیرہ شامل ہیں۔ بین الاقوامی مندوبین ہندستانی فروخت کنندگان کے ساتھ تبادلہ خیال کریں گے اور خریدار وں میں موجودہ خریدار بھی شامل ہیں جو کہ پہلے سے بھی ایک سیاحتی مقام کے طور پر ہندستان کی مارکیٹنگ کررہے ہیں۔ اس میں ایسے ممکنہ خریدار بھی ہیں جو فی الحال ہندستان کی مارکٹنگ تو نہیں کررہے ہیں لیکن اس ملک میں اپنی دلچسپی کا اظہار کررہے ہیں۔ یہ تقریب خریداروں کو ایسے مواقع بھی دستیاب کرارہی ہے کہ وہ ملک میں دستیاب عالمی معیار کی سیاحتی سہولتوں سے روبرو ہوسکیں ۔ ان سیاحتی سہولتوں میں ہوائی اڈہ ، ہوٹل ، سیاحتی مقامات ، مستقبل میں وجود میں آنے والی سہولتیں، ایم آئی سی سہولیات ایڈوینچر ٹورازم اور دیگر منفرد قسم کی مصنوعات کے شعبے میں موجود امکانات ، شامل ہیں۔
فروخت کنندگان کو خریداروں کے ساتھ تبادلہ خیال کے لئے تقریباً 225 اسٹالس دستیاب کرائے گئے ہیں۔ ان میں ریاستوں اور مرکز کے زیر انتظام علاقوں کے لئے پویلین شامل ہیں تاکہ وہ یہاں پر اپنے منفرد سیاحتی مقامات اور مصنوعات کی نمائش کرسکیں۔ اس تین روزہ تقریب کے دوران خریداروں اور فروخت کنندگان پر مشتمل مندوبین کے درمیان بزنس ٹوبزنس میٹنگ بھی منعقد ہورہی ہے۔
ایف اے آئی ٹی ایچ اور ریاستی حکومتیں خریداروں اور غیر ملکی مندوبین کے لئے پری اینڈ پوسٹ ایف اے ایم یعنی فیملیارائزیشن ٹرپس کا اہتمام بھی کررہی ہیں۔
